ТОП 5: Продадоа најмногу струја во Македонија, двајца трговци се новоетаблирани од Албанија
Две компании, во крајна сопственост на бизнисмени од Албанија – Соле 24 и ЕТМТ Енерџи, се во Топ-5 најголеми продавачи на мегаватчасови електрична енергија на слободниот пазар за минатата година во Македонија.
Прв во продажбата на струја на нерегулираниот пазар е когенеративната централа која во Скопје работи на гас, ТЕ-ТО, која во последно време е на удар на власта поради руската поврзаност. ТЕ-ТО во текот на 2023 направил продажби од 210 милиони евра и остварил добивка од околу 3,3 милиони евра. Добивката е сепак далеку помала од остварена од 11,5 милиони евра од една година претходно. Треба да се напомене дека дел од приходите оваа компанија ги остварува од продажба на топлинска енергија.
На второто место е Соле 24, која се етаблираше за кратко време-односно за само една година, а таму од неодамна управител е ќерката на заменик-министерката за здравство, Маја Манолева. Соле 24 остварил приходи од околу 64 милиони евра и ланска добивка од 1,15 милиони евра. Како споредба, компанијата во 2022 има приходи од само 3.000 евра.
На третото место по продадени количини на електрична енергија во земјата е ЕВН Трејдинг, фирма-ќерка на АД ЕВН, која е специјализирана за продажба на струја на слободниот пазар. ЕВН Трејдинг има наплата од околу 41 милиони евра, но добивката била само 41.406 денари.
Следен е ЕТМТ Енерџи со остварена продажба од 100 милиони евра. Треба да се напомене дека дел од овие приходи, слично како и Соле 24, се остварени и од продажба на аукции за АД ЕСМ кога државните еелктрани имаат недостиг на производство. ЕТМТ Енерџи за 2023 има загуба од минус 5.416.441 денари. Ова е донекаде чудно ако се знае дека во 2022, годината на пробивот на трговецот, имаше продажби од 120 милиони евра и добивка поголема од 15 милиони евра.
Последен од петорката најголеми продавачи е ЕСМ Продажба, фирмата ќерка на АД ЕСМ, задолжена за продажба на вишоци на електрична енергија, која покрај тоа и набавува природен гас за скопските топлани, а од лани таму директорка е Мерита Мустафаи, кадар на ДУИ. ЕСМ Продажба има приход од 115 милиони евра со годишен раст од 6 отсто и добивка од 8,2 милиони со раст од дури 65 проценти.
Овие пет трговци зафаќаат 70 отсто од вкупниот слободен пазар на продадена електрична енергија.
А.К.
