„Тетово сака парк“: Наместо парк, 2.000 станови – веднаш да се суспендираат одлуките за промена на ГУП и ДУП за Монопол!
Граѓанската иницијатива „Тетово сака парк“ на Фејсбук објави дека просторот на поранешниот „Монопол“, кој бил идеален за градски парк, е продаден за само 7.000 евра за изградба на 2.000 станови.
Како што велат, општината немала слух, волја и давала разноразни контрадикторни и неосновани изговори за неприфаќањето на нашиот предлог.
„Кон крајот на 2024 година Советот на Општина Тетово ги променил Генералниот и Деталниот урбанистички план за просторот на тетовскиот „Монопол“, но не за да предвиди парк, туку за да се овозможи изградба на станбени згради за околу 2.000 станови. Веднаш потоа државното земјиште е отуѓено, односно продадено на поединци за смешни 7.000 евра. Биљал Касами не кажува аргумент зошто мнозинството во Советот на Општината ги изменило плановите, и како тоа тој го дозволил. Работа на градоначалникот и советниците не е грижата за приватниот капитал на градежниците и урбаната мафија, туку за јавниот и заеднички интерес на луѓето. Туѓите грешки од 2014 година, не се оправдување за денешните фатални грешки“, велат од таму.
Тие додаваат дека кога предупредувале дека се сомневаат дека зад ваквото неприфаќање на предлогот се кријат лукративни мотиви, Биљал Касами измислувал непотребни националистички провокации.
„Кога предупредувавме дека е последна можност сите граѓани да добијат зелен јавен простор, наместо неколкумина да свртат милиони на грбот на јавното добро Биљал Касами и дел од советниците нѐ игнорираа и нѐ обвинуваа дека имаме други мотиви и цели, а не градење на парк. На крајот се покажува дека не сме биле ние тие кои сме имале скриени мотиви за нашиот предлог, туку некој друг имал свои скриени мотиви за неговото неприфаќање. Во крајна линија, градење на парк не генерира профит – а од друга страна градењето на станбени згради генерира огромен профит – па јасно е сѐ“, велат од граѓанската иницијатива.
Тие апелираат до советниците веднаш да се суспендираат одлуките за промена на ГУП и ДУП за просторот на тетовски „Монопол“ и да се интензивира процесот на изработка на нов, современ Генерален урбанистички план за Тетово, процес кој е во тек, но се одолговлекува.
