Таткото на Нермин Сулејмановиќ: Само пијам апчиња, гледам во таванот и си замислувам дека не знам ништо
Фикрет Сулејмановиќ, татко на убиецот од босанскиот град Градачац, Нермин Сулејмановиќ, откри дека се срами од својот син. Пред четири дена, син му уби 3 лица, а потоа се самоуби.
„Мајка му почина пред неколку години, таа живееше со него. Полицијата го знаеше подобро, само да го уапсеа навреме, да го отстранеа, да направеа било што… но видовте дека никој не се занимавал со тоа, па чекавме да експлодира и го направи тоа што го направи“, вели Фикрет.
Тој раскажа дека претходно се сретнал со својата снаа Низама Хеќимовиќ, која синот ја уби во петокот. Таткото на Нермин тогаш се надевал дека син му се смирил.
„Решив еден ден да ги видам, па ја наведнав главата и отидов кај нив. Ги видов Низама и бебето пет минути. Бев среќен. Имаше дете, мислев дека ќе се подобри, дека ќе биде подобар поради бебето. Сепак, тој остана ист. Кој не би се надевал дека неговото дете ќе биде подобро, кој не би?“, прашува разочараниот татко.
Вели дека од болка не може ни да мисли на масакрот.
„Само пијам апчиња и гледам во таванот и си замислувам дека не знам ништо“, додава таткото на убиецот.
Нермин ја уби сопругата пред викендицата во Шибовац, недалеку од Градачац, додека нивната ќерка лежела во локва крв и плачела. Тој ја прашал жената зошто го пријавила во полиција, а таа му одговорила дека се плашела за себе и за детето.
Откако ја претепал и убил својата невенчана сопруга, Нермин убил уште две лица, татко и син (23), турски државјани, Џенгиз Ондер и Џенгиз Денис. Ранета е и сопругата на убиениот, која е во критична состојба на Клиниката за анестезиологија и реанимација во Тузла.
Убиството поттикна протести во повеќе босански градови.
