Супервештачењето утврди пропусти по царскиот рез на Јилдиз Веапоска: Одговорноста ја носи гинекологот Мухамед Асани
Супервештачењето на Судско–медицинскиот одбор при Медицинскиот факултет во Скопје утврдило сериозни пропусти во постоперативната нега на Јилдиз Веапоска од Дебар, родилка на која по породувањето и биле отстранети матката, јајникот и бубрегот. На денешното рочиште во Основниот суд во Струга беше презентиран извештајот кој ја утврдува одговорноста на првообвинетиот, гинекологот Мухамед Асани, кој ја извршил интервенцијата.
Според изнесеното од д-р Верица Попоска од Институтот за судска медицина, второобвинетиот Блертон Асани, кој тогаш бил специјализант, не можел да сноси одговорност за текот и последиците од интервенцијата. Одговорност не беше лоцирана ниту кај третообвинетата д-р Лилјана Јовановска, која не била дел од постоперативниот третман на родилката.
Вештачењето покажало дека состојбата на пациентката се влошила уште на 27 август 2020 година, веднаш по царскиот рез. Анализите укажувале на значителен пад на вредностите во крвната слика, но, како што истакна Попоска, не биле преземени неопходните дијагностички мерки за да се утврди причината за влошувањето.
„Пропусти се направени постоперативно. Ако навреме се спроведеа потребните дијагностички постапки, веднаш ќе требаше да се пристапи кон хируршка интервенција за да се спречи масивното крварење. Тоа ќе го избегнеше драматичното влошување на четвртиот ден, кога пациентката веќе била во хеморагичен шок“, појасни Попоска. Таа додаде дека хируршкиот зафат на четвртиот ден бил направен единствено со цел да и се спаси животот.
Според извештајот, пациентката во состојба на шок прво била оперирана во Струшката болница, каде биле отстранети матката и левиот јајник, а потоа и левиот бубрег. Бидејќи продолжувала да губи крв, таа била пренесена во Клиничкиот центар во Скопје, каде е направена уште една интервенција – подврзување на левата бубрежна артерија.
„Пациентката и понатаму била во животна опасност. Доколку не беше префрлена во Скопје, исходот ќе беше фатален“, нагласи Попоска. Тројцата членови на супервештачкиот тим изјавија дека во нивната долгогодишна пракса досега не се соочиле со ваков случај.
На денешното рочиште, јавната обвинителка Ермира Муса–Нура предложи измени во обвинителниот предлог. Одбраната побара дополнително време за разгледување, а обвинетите тврдеа дека не го разбрале новиот текст и дека не биле присутни во постоперативниот период на пациентката.
Судењето продолжува во петок, кога треба да бидат сослушани обвинетите и да бидат дадени завршните зборови.
