Судењето за таткото на Васил Јованов одложено
Судењето против Зоран Јованов, татко на Васил Јованов – младиот возач кој во јануари годинава ја усмрти 22-годишната Фросина Кулакова на булевар „Партизански Одреди“ – е одложено за 3 септември 2025 година.
Рочиштето кое требаше да се одржи денеска не започна поради отсуство на обвинетиот. Како што појасни судијката Снежана Марковска, поканата до Јованов не била уредно доставена, а судот не добил потврда дека тој лично ја примил.
„Испратено е барање до МВР за ажурирани адресни податоци и за достава на поканата. Повратницата е вратена со печат и потпис, но без доказ дека обвинетиот ја примил поканата“, изјави судијката.
На рочиштето не се појавија ниту адвокатот на Јованов, Сашо Дуковски, за кого исто така нема доказ за уредна достава, ниту сведокот Софија Черепналковска, за која е пријавено дека се наоѓа во странство.
Во меѓувреме, Обвинителството изврши измена на обвинителниот предлог. Наместо за „предизвикување општа опасност“, Јованов сега се гони за „загрозување на безбедноста на сообраќајот со опасно дејствие или средства“.
„Се појавија нови докази што наложија измена на фактичката состојба. Новата квалификација е поблага, но прецизнија и се темели на начелото на специјалитет“, објасни јавниот обвинител Александар Марковски.
Судот ќе испрати нови покани до обвинетиот и неговиот адвокат, заедно со изменетиот обвинителен акт.
На денешното рочиште присуствуваше и таткото на Фросина Кулакова, кој изрази сомнеж за тоа што истиот судија го води и овој предмет, и предметот против Васил Јованов. Тој најави поднесување кривична пријава.
Обвинението против Зоран Јованов се однесува на тоа дека во период од ноември 2022 до јануари 2025 година му дозволувал на својот син да управува возило и покрај тоа што немал возачка дозвола и имал бројни прекршоци и претходна сообраќајна историја.
