Судењето за „Ласкарци“ продолжува со сослушување на вештаци кои го изготвија супервештачењето

Во Основниот кривичен суд утрово обвинителот Дарко Јакимовски започна со испитување на вештаците од тимовите кои го изготвија супервештачењето за случајот „Ласкарци“.

Досега сите прашања кои се поставени од страна на обвинителот се однесуваат на стручноста и компетентноста на вештаците, за што, во неколку наврати, реагираа бранителите на обвинетите, кои истакнаа дека тоа е само обид за дискредитирање на вештаците.

Рочиштето продолжува со испитување на вештаците од страна на обвинителот.

Имено, на минатото пристигна вештиот наод од Бирото за вештачење, нарачан од Судот во декември 2021 година и истиот им беше доставен на обвинителот и обвинетите преку нивните бранители.
Претходно, судот донесе решение, по дадена согласност на сите странки, поради економичност и целисходност на постапка, сите досега изведени докази да се прочитаат и постапката да продолжи денеска со увид во супервештачењата.

Супервештачењето што Судот го нарача во декември 2021 година беше одбиено од факултетите од државава, со објаснување дека нивните вешти лица веќе учествувале во претходното вештачење, а Техничкиот факултет во Битола, своевремено, дополнително извести и дека го вратиле предметот бидејќи нивните лиценцирани вештаци за машинство се стручни само за енергетика и не можат да вештачат моторни возила. Од Кривичен, потоа, информираа дека контактирале со Универзитетот во Штип и Машинскиот факултет во Скопје, од каде што биле известени дека тие немаат доволно лиценцирани вешти лица за сообраќајни возила кои не учествувале во претходните вештачења. Откако факултетите одбија, предметот беше испратен во Бирото за судски вештачења кое има можност да формира тим од лиценцирани вешти лица кои ќе направат супервештачење.

Обвинети во случајот за несреќата кај Ласкарци, што се случи на 13 февруари 2019 година, а во која загинаа 16 лица и над 30 беа тешко повредени, се Дурмиш Белули, сопственик на компанијата „Дурмо турс“, одговорниот за транспорт во фирмата, Ремзи Мифтари, и возачот на автобусот, Маноил Трифуновски, кои се товарат за сторени тешки дела против безбедноста на луѓето и имотот во сообраќајот, додека, тројцата вработени во станицата за технички преглед, Игор Ѓорѓиевски, Горан Дуковски и Јане Боварски, се товарат за соучество во истото дело.

Судскиот процес за несреќата што започна во септември 2019 година го води судијката Диана Груевска Илиевска, а застапник на обвинението е јавниот обвинител, Дарко Јакимовски.