Станарите обвинуваат за доцнење и злоупотреба, инвеститорот „Нов Дом Инвест“ уверува дека зградата наскоро ќе биде готова

Сопствениците на станови во зграда во изградба на улицата Козара бр. 21 во скопската населба Капиштец упатија јавна реакција против инвеститорот „Нов Дом Инвест“ и институциите, поради повеќегодишно доцнење, како и, според нив, злоупотреба на нивните уплатени средства.

Тие истакнуваат дека зградата требало да биде завршена и предадена во мај 2023 година, но и две години подоцна, објектот сè уште не е готов. „Наместо градежни активности, присутни се повремено само еден или двајца работници кои изведуваат незначителни зафати, со очигледна цел да се даде лажна слика дека работите напредуваат“, се наведува во реакцијата.

Како главна причина за доцнењето, станарите ја посочуваат злоупотребата на средствата – обвинувајќи дека парите од нивните станови биле пренасочени кон изградба на други згради во Дебар Маало, кои инвеститорот ги започнал и завршил во рекордно време.

Дополнително, изразуваат сомнеж дека инвеститорот намерно ја пролонгира изградбата со цел некои купувачи да се откажат од договорите, за потоа становите да се препродадат по повисоки цени, имајќи предвид растот на пазарот во изминатиот период.

Сопствениците упатуваат критика и кон државата и законската регулатива, оценувајќи дека измените на Законот за градење – кои го продолжуваат рокот за изградба на станбени објекти од 6 на 10 години – не само што не ги штитат граѓаните, туку и го охрабруваат инвеститорскиот неморал.

„Ова не е изолиран случај. Имаме информации за уште многу објекти кои доцнат и каде се прекршуваат договорите. Граѓаните се оставени сами, без правна и институционална заштита“, велат станарите и бараат:

Од инвеститорот „Нов Дом Инвест“ за 4NEWS.mk велат дека зградата е во завршна фаза, при што останува да се монтираат санитарии, внатрешни врати и подови, а лифтот веќе е набавен. Според нив, работите ќе бидат финализирани во август и септември, по што ќе следи вселување.

Тие ги отфрлаат обвинувањата за злоупотреба или намерно пролонгирање на изградбата и тврдат дека „објектот е целосно фискално чист, без хипотеки или задолжувања“. Како главна причина за доцнењето ја наведуваат енормната инфлација и растот на цените на материјалите и работната рака, што резултирало и со раскинување и ревидирање на договори со подизведувачи.

„Објектот ќе биде завршен во најкус можен рок. Никогаш не сме нуделе раскинување на договори со цел препродажба. Тоа е спротивно на нашиот морал и законските рамки“, се наведува во нивниот одоговор до нашата редакција.