Советот на јавни обвинители ја исклучи јавноста од расправата за разрешување на Коцевски
Советот на јавни обвинители ја исклучи јавноста од расправата за разгледување на предлогот за разрешување на државниот јавен обвинител Љупчо Коцевски. Членовите на Советот се собраа денеска по две одложувања за да ја разгледаат оваа точка, но веднаш беше предложено седницата да се одржи зад затворени врати. Причината за оваа одлука, како што беше истакнато, е сензитивноста на ситуацијата и податоците и доказите кои ќе бидат изнесени.
Предлогот за затворање на седницата беше даден од членката на Советот, Зорица Павловиќ, која се повика на член 10 од Законот за Совет на јавни обвинители, нагласувајќи дека тоа е потребно за заштита на угледот на јавниот обвинител и доверливоста на фактите и доказите кои ќе бидат презентирани.
Независно од тоа, и нејзината колешка, Светлана Стојковиќ, го поддржа истиот предлог, додавајќи дека јавноста треба да биде исклучена и поради сензитивноста на ситуацијата по трагедијата во Кочани, како и заштитата на угледот и интегритетот на јавниот обвинител.
Дискусијата за разгледување на предлогот продолжува, а Советот најави дека јавноста ќе биде информирана кога ќе заврши расправата и кога ќе се премине на гласање за мислењето што треба да го донесе во однос на предлогот за разрешување на Коцевски.
Советот има рок до утре да го достави своето мислење по предлогот на Владата, иако според најновите информации, тоа нема да има влијание на целокупната постапка. Владата реши да ја прекине постапката по трагедијата во Кочани, каде загинаа 59 лица, и како што најави премиерот Христијан Мицкоски, истата ќе остане во сегашната фаза додека трае истрагата за пожарот во Кочани.
Владината портпаролка, Марија Митева, на прес-конференција изјави дека, дури и ако Советот на јавни обвинители достави мислење, Владата нема да го проследи до Собранието, туку ќе ја прекине постапката.
