Советникот Аки Акиов јавно се извини за инцидентот со фрлање шише на седница во Кочани
Аки Акиов, советник во Советот на Општина Кочани од Партијата за демократски просперитет на Ромите, денеска на седница јавно ѝ се извини на вработената во општината која беше погодена во глава со пластично шише за време на претходната седница на 19 јуни.
„Сакам јавно и недвосмислено да ѝ се извинам на вработената во Општина Кочани, поради тоа што во момент на афект и под силен притисок на груби навреди, ненамерно фрлив пластично шише. Таа не беше цел и не заслужуваше да се најде во таа ситуација. Од срце изразувам жалење и извинување“, изјави Акиов пред членовите на Советот и јавноста.
Инцидентот се случи за време на вербална расправија меѓу Акиов и советникот од ВМРО-ДПМНЕ, Васе Алексов. Според сведоци, по дофрлања и навреди, Акиов тргнал физички кон Алексов, но потоа фрлил шише кое случајно ја погодило службеничката што се наоѓала меѓу двајцата.
„Сакам да истакнам дека тој ден бев повеќекратно провоциран, и како личност и како припадник на ромската заедница“, додаде Акиов.
Настанот предизвика бројни реакции во јавноста и осуди за насилно однесување во институции, по што беше најавено дека инцидентот ќе се разгледа и во институционална постапка. Засега не е познато дали против советникот ќе бидат поведени и дисциплински или кривични мерки.
