Со оперски пејач од Косово вицепремиерот Меџити ќе слави 24 години од Рамковниот договор

Денеска во Филхармонијата на Македонија, ќе се одржи гала вечер по повод 24-годишнината од потпишувањето на Охридскиот рамковен договор. Настанот се организира под покровителство на првиот заменик-претседател на Владата, Изет Меџити, кој ќе биде и говорник на свеченоста.

Покрај информациите за датумот, времето и местото на одржување на настанот, во поканата се наведува дека ќе настапи познатиот оперски тенор од Косово, Раме Лахај. Станува збор за 41-годишен уметник роден во Исток, кој е еден од првите косовски оперски пејачи што настапувале во најпрестижните оперски куќи во светот, делејќи ја сцената со светски оперски легенди.

„Растењето во земја управувана од тоталитарен режим значително влијаело врз раниот живот на Лахај. Тој имал само 15 години кога избувнала косовската војна. Лахај е првиот уметник од Косово, пред и по војната, кој настапил на најважните меѓународни сцени на операта заедно со големи имиња како оперската легенда Пласидо Доминго, кој му додели и најпрестижната награда на Светскиот оперски натпревар ‘Опералија’ во 2016 година“, се наведува во неговата биографија.

Лахај настапува на оперската сцена од 2010 година, а неговото присуство на гала вечерта го прави настанот уште повпечатлив и значаен за одбележување на годишнината од Рамковниот договор.