Случајот за убиството на Вања и Панче влегува во завршна фаза: Обвинителството денеска со завршни зборови
Во Основниот кривичен суд Скопје, денеска треба да продолжи судењето за бруталното убиство на 14-годишната Вања Ѓорчевска и велешанецот Панче Жежовски, со завршни зборови од страна на обвинителството. Ова доаѓа откако на последното рочиште беше официјално затворена доказната постапка во предметот кој ја потресе јавноста.
Судењето започна во септември 2024 година, а досега беа сослушани десетици сведоци – членови на семејствата на жртвите, инспектори, службени лица и лица блиски до обвинетите. Презентирани беа и материјални докази, вклучително и видео-снимки, електронска комуникација и физички предмети поврзани со убиствата.
Обвинителството тврди дека првообвинетиот Љупчо Палевски, заедно со Боре Видевски, Велибор Манев, Влатко Кешишов и Александар Ѓорчевски, организирале киднапирање на Вања со цел да изнудат пари од нејзиното семејство. Според обвинението, Жежовски бил грабнат со намера да се одземе неговото возило „Ситроен“, кое подоцна било користено при киднапирањето на девојчето.
Обвинетите се изјаснија за невини, а Палевски тврдеше дека судскиот процес е политички мотивиран.
Вања и Панче беа пријавени за исчезнати на крајот од ноември 2023 година, а нивните тела беа пронајдени на 3 декември, во околината на Скопје и Велес. Случајот предизвика длабоко згрозување во јавноста и покрена низа прашања за безбедносниот систем и заштитата на децата.
Очекувањата се дека по завршните зборови, судот ќе најави датум за изрекување на пресудата.
