Сиљановска Давкова: Уставниот суд не е под јурисдикција на соседни политичари – одлуките се конечни
Претседателката на Уставниот суд Гордана Сиљановска Давкова денеска нагласи дека Уставниот суд не е под јурисдикција на соседни политичари и дека одлуките на судот се конечни и не се коментираат. Коментарот доаѓа по писмото на бугарскиот министер за надворешни работи Георг Георгиев до неговите колеги од ЕУ, во кое тој ја оцени иницијативата за оценка на уставноста на Протоколот од Договорот за доброседство со Бугарија како непотребна и правно апсурдна. Иницијативата беше поднесена од поранешната пратеничка Лилјана Поповска.
„Непријатно ми е да коментирам вакви изјави, како и да се даваат коментари за работа на Уставниот суд. Уставните судови се дури и надвор од поделбата на власта во државата и сигурно не се под јурисдикција на соседни политичари. Ако некој покренал постапка, Уставниот суд ќе реши дали има основ за нејзино проследување. Одлуките на уставните судови се конечни и не се коментираат“, рече Сиљановска Давкова по доделувањето на признанието „Инженерски прстен“ во Охрид.
Уставниот суд на 13-ти минатиот месец информираше дека е формиран предмет во кој се оспорува Протоколот од вториот состанок на Заедничката меѓувладина комисија со Бугарија, одржан на 17 јули 2022 година во Софија. Во тек е претходна постапка за проверка на податоците и известувањата потребни за донесување на одлука.
Поповска во иницијативата наведува дека Протоколот го прекршува Уставот, има несоодветна форма и содржина и дека излегува надвор од рамките на правен акт кој обработува еден член од Договорот меѓу двете земји. Таа тврди дека Протоколот создава штетни дејствија врз идентитетските прашања за македонскиот народ, јазик и држава и бара негово поништување според Виенската конвенција за договорното право (1969), која овозможува поништување во случај на спротивност со императивните норми на општото меѓународно право.
Иницијативата, меѓу другото, истакнува дека Протоколот не е ратификуван во Собранието, не е објавен во „Службен весник на Република Северна Македонија“ и не ја почитува процедурaта утврдена со Законот за склучување, ратификација и извршување на меѓународни договори. Поповска посочува дека Протоколот останува само записник од состанок на Меѓувладина комисија, за разлика од бугарската собраниска процедура која го усвоила текстот уште на 23 јуни 2022 година, еден месец пред да биде потпишан на состанокот на министрите за надворешни работи на двете земји.
