Сиљановска-Давкова со честитка по повод 8 Април: Ромската заедница е богат човечки потенцијал што мора да се впрегне во општествениот погон
Претседателката на државата, Гордана Сиљановска-Давкова, упати честитка по повод 8 Април – Меѓународниот ден на Ромите, во која изрази признание за придонесот на ромската заедница и повика на конкретни мерки за подобрување на нивната положба во општеството.
„Со културната посебност и свест, вие израснавте во важен и вреден сегмент на македонското општество – неверојатно талентиран за музика и игра, уметнички вдахнат, скромен“, порача Сиљановска-Давкова.
Во својата порака, претседателката ги истакна постигнувањата на ромската заедница – од политичко претставување до уметнички и академски достигнувања. Но, таа и укажа дека ромската заедница и понатаму останува најранлива, најмаргинализирана и најдискриминирана во општеството.
„Време е да преминеме од зборови на дела – со афирмативни акции, инклузивни политики и реална поддршка, да им дадеме простор на Ромите да ги изразат своите идеи и да придонесат во демократскиот развој“, апелираше таа.
Сиљановска-Давкова порача дека ромското тркало, симболот на ромското знаме, мора да се заврти „дома – не само на 8 Април, туку постојано, посилно, побрзо и подалеку, во интерес на прогресот“.
„Нека ни е честит 8 Април – Меѓународниот ден на Ромите“, заврши честитката.
