Семејствата на жртвите од трагедијата во Кочани со порака: „Нашите деца беа убиени од алчноста – правдата мора да излезе на виделина“
Силна, емотивна и болна порака упати Јулија Златкова – мајка која го загуби своето дете во трагичниот пожар во дискотеката „Пулс“ во Кочани. Во статус објавен на Фејсбук, таа го изрази својот бунт, разочараност и длабока болка поради, како што наведува, молкот и неказнивоста на институциите, кои наместо правда – испорачуваат рамнодушност.
„На Велигден ќе одиме на гробишта да им оставиме јајца на нашите ангели, чии кревети останаа празни, а срцата ни се завиени во црнило“, напиша Златкова.
Во потресниот статус таа прашува зошто децата ги нема, зошто никој не одговара, и зошто – како што вели – институциите што требало да ги заштитат граѓаните молчат, додека вината ја покриваат со корупција и интереси.
Таа истакнува дека родителите на загинатите нема да се откажат и ќе продолжат да протестираат секоја сабота, барајќи правда за децата кои не дочекаа полнолетство, матура, свадба или втор Велигден.
„Никој од нас не растел дете да стане херој, туку да стане човек. Вие ги убивте нашите деца“, стои во објавата.
Златкова повика на одговорност – од највисоките државни функции до сите кои, како што пишува, „виделе, а не реагирале“: од премиерот и министрите, преку инспекторите, па сѐ до полицајците кои, според неа, замижале пред неправилностите.
„Нашите деца ги нема, но нашата борба не престанува. За нивна чест, за иднината на другите деца – правдата мора да излезе на виделина“, порача Јулија Златкова, симболично најавувајќи дека наместо со семејствата, Велигден ќе го поминат на гробишта.
