Села: Јас го направив Таравари политичар, а тој покажа детско однесување што не доликува на лидер!
Поранешниот претседател на Алијанса за Албанците и актуелен претседател на Централното Собрание на партијата, Зијадин Села во интервју за Клан Македонија истакна дека тој е најзаслужен за тоа Арбен Таравари да стане политичар.
„Во 2016 година никој политички не го познаваше Арбен Таравари. Во 2014, 2015 година кога го започнав Движењето за реформи, го поставив за генерален секретар. Во 2016 година беше втор на листата за пратеник во изборната единица број 1. Загуби. После тоа го направив министер за здравство, напредуваше“, вели Села.
Тој го повтори својот став односно дека останува на тоа дека партијата ќе се натпреварува сама на изборите на 8 мај, и истакна дека коалицијата со албанската опозиција не гарантира промена.
„Таравари реши годинава да ги заобиколува партиските тела, не доаѓаше на состаноци, а одеше на тајни средби со други лидери без при тоа со него да отиде и друг член на раководството на партијата. Покажа детско однесување што не доликува на лидер. И, почна да прифаќа директиви од надвор. Скандалозно е на средба со косовскиот премиер Албин Курти што отиде сам, без ниту еден член на Претседателството на АА. Се додека Зиадин Села политички дише во Алијансата, јас не сум дозволил и нема да дозволам фактори од надвор да ја контролираат партијата“, рече тој.
