СЕ ЗНАЕ ЛИ КОЈ ЌЕ ГО ЗАМЕНИ ПРОФЕСОРОТ МИХАИЛ ПЕТКОВСКИ ВО ДИРЕКТОРСКИОТ БОРД НА „ТЕТЕКС“ – акционерите ќе гласаат на Собрание во ноември

Тетовскиот комбинат „Тетекс“ закажа акционерско собрание за 20 ноември, а една од одлуките за кои ќе гласаат акционерите е избор на член на Одборот на директори.

Во најавата за акционерското собрание не е наведено кој ќе биде избран за нов член на Одборот на директори.

Она што се знае е дека тој член треба да го замени професорот Михаил Петковски, кој поднесе оставка од местото член на Одборот на директори на Тетекс. Предлогот за избор на нов член го даваат група акционери, за кои не е наведено кои се и колкав акционерски капитал поседуваат.   

Се наведува дека мандатот на членовите на
 Одбор на директори  е шест години и тече сметано од денот на влегување во сила на одлуката за нивни избор. На членовите на
Одбор на директори им се утврдуваат
права и обврски согласно законот, друштвото и договорите.

Исто така, акционерите треба да гласаат за одлука според која од редот на избрани
неизвршни членови, за независни членови се избираат Звонимир Ристовски и Душко
Мишевски, согласно одредбите од
Законот за трговски друштва.

Одлука која треба да се донесе на акционерското собрание е и таа дека на претседателот 
на Одборот на директори на Тетекс му се утврдува месечен паушал во бруто износ од 50.000 денари.

Според податоците од Берзата, претседател на Бордот на директори на Тетекс е Борислав Трповски, што значи дека за него е утврден овој месечен паушал од 50 илјади денари. 

Други членови сега на Одборот на директори се Бобан Гоговски, извршен член и генерален директор на компанијата, Стеван Томовски, Звонимир Ристовски, неизвршен член и независен член, Евгенија Трпкоска и Душко Мишески.

Една од одлуките на акционерите треба да биде и таа на неизвршните  членови на Одборот на директори
на Тетекс да им се утврди месечен паушал во бруто износ од 33.333 денари. Тоа значи дека овие паушали ќе ги земаат Ристовски и Мишевски.

Инаку, акционерите ќе гласаат и за предлог одлуката за измена на Статут на Тетекс од април 2020 година, според кој Одборот на директори ќе има седум члена,
од кои пет неизвршни членови, и два  извршни члена, од кои едниот го носи
називот Главен извршен директор.

Н.Н.Ф.