Се предаде српскиот политичар Ного кој објавуваше снимки од „цитроенот“ со кој беше киднапирана Вања
Денеска во Вишото јавно обвинителство во Белград сослушан е Срѓан Ного.
За него постојат основи на сомнение дека сторил кривично дело Повикување на насилна промена на уставниот поредок од член 309 од Кривичниот законик, а постои и сомневање дека се заканувал на претседателот на Србија со смрт, како и дека ги повикувал граѓаните да убиваат припадници на Министерството за внатрешни работи.
Обвинителството по рочиштето му предложи на судијата на претходна постапка да му одреди мерка притвор на осомничениот за да се спречи во краток рок да го повтори кривичното дело.
Овој политичар стана познат и во македонската јавност откако лани на својот Јутјуб канал објавуваше снимки, но и теории за исчезнувањето и убиствата на Панче Жежовски и Вања Ѓорчевски.
Тогаш тврдеше дека таткото на Вања, Александар бил наместен од страна на полицијата, а откри и дека Александар, а не полицијата практично дознал кој ја киднапирал Вања.
Исто така, тој е меѓу првите кој објави и снимка од „цитроенот“ на Панче Жежовски.
