Се крпат дупките на улиците – Ѓорѓиевски вели тротоарите не се паркинзи и повеќе нема така да се третираат!
Градоначалникот на Град Скопје, Орце Ѓорѓиевски на својот Фејсбук профил истакна дека тротоарите не се паркинзи, и повеќе нема да се дозволи така да се третираат.
Како што вели, се работи низ целото Скопје.
„Во овој момент се работи паралелно на повеќе локации низ целата територија на Скопје.
Екипите на градот интервенираат со ладен асфалт за затворање на ударните дупки на булеварите и улиците, брзи зафати кои се неопходни поради зимските услови.
А напролет, кога временските услови ќе дозволат, се насочуваме кон сериозна, темелна и целосна обнова на коловозите.
Паралелно, ги ослободуваме тротоарите за пешаците преку поставување на столбчиња.
Тротоарите не се паркинзи и повеќе нема да дозволиме така да се третираат.
Во централното градско подрачје и на сите места каде што е потребно се поставува нова урбана опрема, со цел да внесеме повеќе ред, функционалност и достоинствен изглед на јавниот простор.
Овие тековни зафати што денес ги гледаме се само увертира во големите проекти што следуваат.
Градиме чекор по чекор, со јасна визија и решеност да го вратиме Скопје на местото кое заслужува“, вели Ѓорѓиевски.
