Салиу: Не чувствувам никаква вина за пожарот во дискотеката „Пулс“
Поранешниот директор на Дирекцијата за заштита и спасување и актуелен лидер на Демократски сили на Ромите, Шабан Салиу, денеска изјави дека не чувствува апсолутно никаква вина или одговорност во врска со трагичниот пожар во дискотеката „Пулс“ во Кочани, во кој загинаа 63 лица, а над 200 беа повредени.
Во одговор на новинарско прашање за неговата вмешаност и одговорност, Салиу изјави дека има целосна доверба во институциите и правосудниот систем.
– Апсолутно во тој поглед не чувствувам одговорност. Верувам во нашата држава, во системот и во правосудните органи. Сигурен сум дека правилно ќе ги разгледаат сите аргументи и околности поврзани со случајот. Јас сум правник по професија, доктор по политички и правни науки, и сум работел како адвокат. Со душа и со срце тврдам дека немам никаква вина, изјави Салиу.
Иако е еден од опфатените со истрагата за овој трагичен настан, Салиу нагласи дека се води од принципот на презумпција на невиност.
– Се водам од општата правна иницијатива – додека не се докаже вината, секој е невин, додаде тој.
Истрагата за причините и одговорноста за пожарот сè уште е во тек, а јавноста со внимание ги следи сите изјави и развои поврзани со овој трагичен случај.
