Родителите на загинатите во „Пулс“ на средба во Судска медицина: Вистината ќе се докажува во судница
Дел од семејствата на жртвите од трагичниот пожар во кочанската дискотека „Пулс“ денеска остварија средба со директорот на Институтот за судска медицина, д-р Александар Станков. Главна тема на разговор беа токсиколошките анализи од обдукцијата, за кои родителите веќе подолго време бараат одговори.
По средбата, директорот Станков појасни дека Институтот ја завршил целата своја работа и дека сите наоди се веќе доставени до надлежните органи.
„Разговаравме и им беше објаснето сè што е потребно. Како што изјавив и претходно, сè што беше побарано од нас е завршено. Сите докази ќе бидат јавно презентирани во текот на судската постапка“, изјави Станков.
Александар Наунов, претседател на здружението „16 март 2025 Кочани“ и татко на една од загинатите девојки, потврди дека добиле уверување оти токсиколошките анализи се готови, но дека деталите се чуваат за судското рочиште.
Додека траеше средбата, во судницата во Идризово продолжи судењето за катастрофалниот пожар од 16 март 2025 година, во кој животот го загубија 63 лица. Процесот моментално е во доказна постапка, каде се испитуваат сведоци предложени од тимот од 15 јавни обвинители кои го застапуваат случајот под водство на судијката Дијана Груевска-Илиевски.
