РЕАГИРА КАБИНЕТОТ НА ВЈОСА ОСМАНИ: „За жалење“ е начинот на кој е расчистен инцидентот на скопскиот аеродром
Од Кабинетот на косовската претседателка Вјоса Османи велат дека „за жалење“ е начинот на кој е разрешен инцидентот на скопскиот аеродром кој се случи на 2 август.
Македонскиот премиер Христијан Мицкоски на вчерашната прес-конференција рече дека му е жал за инцидентот на скопскиот аеродром во кој учествуваше и косовската претседателка. Неговиот косовски колега Албин Курти рече дека официјалниот извештај ќе го расветли целиот инцидент.
Оттаму додаваат дека претседателката Османи никогаш не побарала пречекорување или прекршување на процедурите, туку почитување на меѓународните правила. Велат дека претседателката на Косово ја претставува државата внатре и надвор.
„И покрај екстремно строгите безбедносни правила на аеродромите во голем број земји, тие го прифаќаат претседателот на државата како највисок претставник на државата и никогаш не бараат да се скенира ниту личната торба, камоли телефонот, а уште помалку да бараат скенирање на целото тело бидејќи тоа, меѓу другото, би значело дека тие го третираат шефот на државата – значи и државата – како потенцијален ризик од тероризам“, се вели во соопштението.
Од кабинетот на Османи велат дека досега институциите на Северна Македонија во ниту еден момент не се осврнале на прашањата покренати во протестната нота.
По инцидентот на аеродромот, началникот на Одделението за лично обезбедување на претседателот на Собранието Африм Гаши доби кривична пријава и е суспендиран.
