Раст на пријави за родово базирано насилство: 391 жртва во првото тримесечје од 2025 година
Во првото тримесечје од 2025 година, во земјава се евидентирани 391 нова жртва на насилство, од кои 284 се жени, 53 мажи, а 54 се деца – секундарни жртви. Од вкупно 286 сторители, 266 биле мажи, додека 20 биле жени. Во овој период се регистрирани 221 случај на физичко насилство, 345 психолошки, два случаи на сексуално и девет случаи на економско насилство. Овие податоци беа презентирани на денешниот настан во Скопје, посветен на промоцијата на видео-матијали од кампањата „Има живот без насилство“, која има за цел да ја подигне јавната свест за родово базираното насилство врз жените.
Според споредбата на податоците од 2023 и 2024 година, бројот на жени жртви на семејно насилство се зголемил за 14,7 проценти во 2024 година, што се должи на зголемената свест и подобреното пријавување на насилството, како и на зголемените активности и мерки за заштита преку мултисекторска соработка помеѓу институциите и граѓанските организации. Во овој период интензивно продолжуваме со комуникациската стратегија и кампањата „Има живот без насилство“, истакнаа организаторите.
Министерот за социјална политика, демографија и млади, Фатмир Лимани, истакна дека насилството има различни форми и дека сите оставаат траги – некои видливи, повеќето невидливи, но сите болни.
Насилството не е само женско прашање, тоа е предизвик за целото општество. Кога една жена се плаши да се врати дома или едно девојче молчи, ние како заедница потфрливме. Можеме да ја смениме оваа реалност – заедно. Им порачувам на жените: не сте сами, има помош и излез. Има живот без насилство. Машкоста не се мери со сила, туку со почит, љубов и поддршка. Ако видиш насилство – реагирај. Ако слушнеш плач – не игнорирај. Ако си родител – научи го детето да почитува, не да доминира, порача Лимани.
Тој упати апел и до институциите да гледаат на жртвата како на човек кој бара надеж, а не како на „предмет“ во папка.
Законот е основа, но човечката чувствителност спасува животи, додаде министерот.
Заменик-амбасадорот на Обединетото Кралство, Даниел Филер, потенцираше дека секој има обврска да пријави насилство.
Обединетото Кралство поддржува вакви проекти ширум светот, особено кога помагаат во превенција и заштита од родово базирано насилство. Никој не смее да страда, а секој треба да ги поддржи преживеаните. Насилството врз жените и девојките не е само лична трагедија, туку општествен неуспех кој влијае на сите заедници и генерации, подвлече Филер.
Настанот го збогати и говорот на Жаклина Гештаковска Алексовска од Фондот за население на Обединетите Нации.
Кампањата и настанот се реализирани во организација на Министерството за социјална политика, демографија и млади, во соработка со УНФПА и со финансиска поддршка од Британската амбасада.
