Путин: Испораката на американска касетна муниција во Украина треба да се третира како злосторство!
Рускиот претседател Владимир Путин изјави во неделата дека испораката на касетна муниција од Вашингтон во Украина треба да се третира како кривично дело.
„Самата администрација на Соединетите Американски Држави (САД) употребата на касетна муниција пред извесно време ја нарече криминал. Мислам дека тоа треба да се третира на тој начин“, рече Путин во интервју за ТВ каналот „Россија-1“.
Путин додаде дека неговата земја го задржува правото да возврати доколку се користи касетна муниција против Русија, додавајќи дека Москва има доволно залихи на различни видови касетна муниција.
„Досега ова не сме го правеле, не сме го користеле, ниту сме имале таква потреба и покрај познатиот недостиг во одреден временски период, а имаме и муниција, но ова не сме го направиле“, рече Путин.
Тој исто така рече дека верува оти САД ја снабдуваат Украина со касетна муниција поради општиот недостиг на муниција.
„Украинската армија троши од 5.000 до 6.000 гранати од 155 калибар дневно за воени дејствија, додека САД произведуваат 15.000 месечно. Немаат доволно, а Европа веќе нема доволно. Но, тие не најдоа ништо подобро од тоа да предложат употреба на касетна муниција“, додаде тој.
Касетната муниција испушта бомби кои се распрснуваат во целната област и може да експлодираат години подоцна предизвикувајќи цивилни жртви.
Конвенцијата на ОН за касетна муниција од 2008 година забранува употреба, производство, складирање и пренос на касетна муниција.
