Протести на Кожуф: Активисти во битка да ја спасат реката Дошница од мали хидроцентрали
Граѓанскиот отпор против изградбата на две мали хидроцентрали на реката Дошница, на планината Кожуф, добива на интензитет. Активистите најавуваат дека, покрај блокадите на терен, ќе поведат и правна битка, обвинувајќи дека јавноста е целосно исклучена од процесот на одобрување на проектите.
Во меѓувреме, Владата му го продолжи рокот на концесионерот за изградба на двете централи за уште една година.
На терен веќе се присутни багери кои расчистуваат простор за изградба. Исечени се делови од шумата, а механизацијата почна интервенции во коритото на реката – слики кои, велат активистите, се веќе видени на десетици други планински реки во земјата, вклучително и во заштитени подрачја.
„Планираните хидроцентрали тотално ќе го уништат биодиверзитетот на Дошница. Најзагрозени се речната пастрмка и автохтоната македонска пчела,“ предупредува Ристо Камов од Гевгелија, член на здружението „Changemakers“.
Тие најавуваат продолжување на блокадите и бараат Владата итно да ја стопира изградбата, а проектот да се преиспита од еколошки и правен аспект.
