Пронајдени телата на 41 жртва од авионската несреќа во Вашингтон, 28 се идентификувани

Досега се извлечени телата на 41 жртва, од кои 28 се идентификувани, по судирот на патнички авион и воен хеликоптер во близина на националниот аеродром Роналд Реган во Вашингтон, соопшти шефот на локалната противпожарна служба.

Во Вашингтон продолжуваат операциите за извлекување на посмртните останки на жртвите по судирот на патнички авион на Американ ерлајнс и воен хеликоптер во средата вечерта, во кој загинаа 67 лица, пренесува АП.

Соборениот хеликоптер UH-60 Black Hawk денеска ќе биде подигнат од реката Потомак каде што авионот се урна по несреќата.

Сите црни кутии од авионот и хеликоптерот се пронајдени, соопштија американските власти.

Аеродромот е отворен, но две од трите писти се затворени. Федералната управа за авијација (FAA) одлучи да ги ограничи летовите со хеликоптери околу аеродромот поради несреќата, барем додека не биде објавен прелиминарниот извештај за причината за несреќата, изјави секретарот за транспорт, Шон Дафи.

Агенцијата АП пренесува дека засега само на полицијата, болничките хеликоптери и претседателските хеликоптери ќе им биде дозволено да летаат меѓу аеродромот и блиските мостови.

Инспекторите ги пронашле таканаречените црни кутии од авионот на Американ ерлајнс, кои се распаднале на неколку парчиња по судир со хеликоптер.

Нуркачите планираат да го вратат леталото и да најдат дополнителни компоненти на авионот.

Националниот одбор за безбедност на транспортот објави дека ќе собира информации од црната кутија – снимка од податоци од летот како и аудио снимка од пилотската кабина – со цел да се најдат нови информации за причината за несреќата.

Комитетот додаде дека е премногу рано да се шпекулира за причините за несреќата и вети дека ќе објави прелиминарен извештај во рок од 30 дена.