Продолжениот викенд завршува со метеж: Долги колони возила за влез во Македонија

Завршувањето на продолжениот празничен викенд по повод Денот на независноста создаде огромни гужви на граничните премини за влез во Македонија. Вечерва, долги колони возила се формираа на граничниот премин Меџитлија, на грчка страна кај преминот Ники.

Фотографиите испратени од граѓани сведочат за километарска колона автомобили кои во ноќните часови чекаат да влезат во државата, враќајќи се од одморот во Грција.

Сликата е очекувана, со оглед на тоа што голем број граѓани го искористија споениот тридневен викенд за патување надвор од земјата.

Ова претставува обратна слика од саботата, кога беа забележани големи гужви за излез од државата на премините Богородица и Табановце. Сега, со крајот на празникот, притисокот е префрлен на влезните точки во Македонија, а се очекува слична состојба и на другите фреквентни гранични премини во текот на ноќта.