Приведени четири лица за пожарот во Труберево, Мицкоски одговорност од Меџити нема да бара
Истрагата за пожарот во фабриката за рециклирање во Трубарево доби драматичен пресврт, откако премиерот Христијан Мицкоски денеска потврди дека четири лица се приведени во врска со случајот. Истовремено, тој најави дека како мерка на претпазливост, сите жители кои се наоѓаат во непосредниот периметар на пожарот ќе бидат евакуирани и згрижени.
При денешната посета на Трубарево, премиерот се обиде и да ја смири загриженоста на јавноста околу загадувањето. „Последните мерења што ги прават и Армијата и Институтот за јавно здравје велат дека немаме вонредно големо загадување. Ако вчера беше на мерна единица помеѓу осум и девет, сега е меѓу пет и шест. Повторно има загадување, но не е вонредно големо. Зборувам во периметар од 100 метри околу местото каде што се случи пожарот“, изјави Мицкоски.
Тој ги повика граѓаните да ги следат препораките од институциите и порача дека нема потреба од паника, бидејќи работата е „целосно под контрола“.
Премиерот, исто така, застана во одбрана на министерот за животна средина, Изет Меџити, по обвинувањата дека тој бил на партиски активности додека траела кризата. „Со Меџити бев цело време на линија и јас вчера. И тој беше на линија со сите министри и Управувачкиот комитет, така што буквално сите мерки беа преземени во текот на вчерашниот ден. И денеска ќе бидат преземени и во деновите што следат“, рече Мицкоски, отфрлајќи ги критиките.
