Придобивките од јогуртот и киселото млеко за здравјето на сите генерации
Јогуртот и киселото млеко се омилените млечни производи на сите генерации, а придобивките од нивното секојдневно консумирање се многу и се со огромно значење
Покрај прекрасниот вкус кој го имаат, и различните начини на кои може да се комбинираат со останатата храна, јогуртот и киселото млеко се два млечни производи кои имаат многу корисни ефекти врз здравјето на децата и возрасните.
Тука како прва придобивка мора да го споменеме дигестивното здравје, односно подоброто варење на храната – кое може да го забележиме доколку секојдневно ги консумираме овие производи. Активните култури на јогуртот и киселото млеко можат да ни помогнат при одредени гастроинтестинални состојби, како што се констипација, дијареја, нетолеранција на лактоза, нервозни црева…
Јогуртот и киселото млеко можат значително да помогнат во јакнење на имунитетот. Тие содржат протеини и се важен извор на аминокиселини. Содржат значителни количини на минерали калциум, магнезиум, железо, јод, калиум и цинк и со тоа придонесуваат за подобро здравје на целиот организам.
Затоа и стојат во листата на омилени производи кај сите генерации… Познато е дека уште при почетоците на исхрана на бебињата, веднаш после првата година родителите често приготвуваат оброци за своите најмали кои содржат јогурт или кисело млеко. Овес со јогурт, палента со кисело млеко, овошен јогурт, па и попара- се само дел од таквиот избор. Возрасните пак ги избираат за верен сојузник со секој појадок или вечера.
