ПРЕТСЕДАТЕЛОТ НА СТОПАНСКАТА КОМОРА БРАНКО АЗЕСКИ ВО „БИЗНИС-КЛУБ“: „НЕ СОЗДАДОВ КОМОРА СО 5 ЅВЕЗДИ, НО ОСТВАРИВ 5 ЅВЕЗДИ ВО СОЗДАВАЊЕТО СТРУЧЕН ЧОВЕЧКИ КАДАР“
Во последната епизода од првата сезона на поткастот „Бизнис-клуб“ гостин е претседателот на Стопанската комора на Северна Македонија Бранко Азески, кој даде свое видување за состојбите во македонскиот бизнис.
Според Азески, првиот впечаток на луѓето што ги следеле поткастите е дека во Македонија има клима за добар бизнис, но, според него, мора да се има квалитетен бизнис-план и прецизни проекти за негов развој. Покрај првите 20-ина лица со кои разговараше претседателот на Комората Азески во улога на домаќин на поткастот „Бизнис-клуб“ и кои ја покажаа својата конзистентност во познавањето на работите во однос на клучните прашања за развој на бизнисот, има уште многу млади бизнисмени кои придонесуваат за македонската економија.
„Нивната темелност, професионализмот и еднаквите погледи на работите во однос на клучните прашања за развој на бизнисот покажуваат дека се работи за плејада на луѓе кои имаат доволно знаење, мудрост и искуство за водење бизнис“, истакна Азески.
Запрашан за честата употреба на изразот олигарси за македонските бизнисмени, Азески даде свое објаснување на зборот олигарх. Тој истакна дека се работи за флоскула за да се одвлече вниманието и дека изразот не е соодветен за силината што ја има македонска економија. Според него, за да се создадат олигарси кои ќе влијаат врз раководството тоа да носи прописи што ќе ја подобруваат нивната позиција, буџетот треба да има многу повеќе пари од оние што ги има сега. Тој потенцираше дека во Македонија нема олигарси и изрази загриженост дека во македонскиот бизнис нема единство, како што се очекува, туку завист. „Ако владееше единството, ќе бевме подобри во сè“, истакна Азески.
Себеси се доживува како дете на транзицијата и смета дека и денес сè уште живее во тој процес, затоа што немало период кога бил зголемен стандардот на граѓаните и кога била подигната продуктивноста на компаниите.
Во продолжение ја објаснува својата изјава дадена по првиот избор за претседател на Комората во 2005 година – дека ќе создаде Комора со 5 ѕвезди каков што е хотелот каде што работел – кажана за да го подигне оптимизмот кај бизнисмените да почнат да веруваат во својата иднина. Според него, гледано од оваа перспектива, можеби не создал Комора со 5 ѕвезди и поволен амбиент за работа на компаниите бидејќи не зависи сè од него, туку и од државата, но остварил 5 ѕвезди кај човечкиот капитал затоа што успеал да создаде кадар од 15-ина врвни експерти кои ќе останат да работат во Комората.
Во првата сезона на поткастот „Бизнис-клуб“ беа опфатени познати млади лидери од македонскиот бизнис, кои доаѓаат од разни дејности – градежната, прехранбената, пивската и автомобилската индустрија, е-маркетингот и банкарството – како и еминентни стручњаци од повеќе области. Преку разговорот со претседателот на Стопанската комора во улога на домаќин и водител на гледачите им се доближија нивните приказни и искуства, нивниот развој и лична стратегија за опстојување во бизнисот во македонски услови, како и предизвиците со кои се соочуваат со своите брендови на светските пазари, затоа што македонските брендови се рамноправни со светските брендови кои продаваат слични производи. Нивната улога во претставувањето на македонската економија е значајна затоа што тие, покрај тоа што ги подобруваат услугите и производите, вработуваат, плаќаат даноци и го полнат буџетот, го зголемуваат БДП, инвестираат и влијаат врз економскиот раст на државата.
Линк до поткастот.
https://youtu.be/wP_8uSDfeT8?si=wo3dWXBJCTZeRfR-
