Правните застапници на семејствата на Вања и Панче се изјаснија дека во целост ги прифаќаат завршните зборови на Обвинителството
По изнесените завршни зборови на Основното јавно обвинителство на денешното судско рочиште за убиството на Вања Ѓорчевска и Панче Жежовски, правните застапници на семејствата на жртвите изјавија дека целосно го поддржуваат обвинението, се приклучуваат кон кривичниот прогон и поднесуваат имотно-правни побарувања.
Полномошникот на мајката и сестрата на Вања Ѓорчевска поднесе писмено барање за отштета за нанесена нематеријална штета, укажувајќи на тешките психички последици и ненадоместливата загуба. Во барањето се нагласува дека отштетата треба да се исплати солидарно од страна на обвинетите, со цел да се избегне нова траума преку водење граѓанска постапка.
Адвокатката на мајката Зорица и сестрата Миња побара од Судот да пренесе лично обраќање од мајката, но тоа не беше дозволено во целост. Во писменото обраќање, мајката Зорица истакнува:
„Не се обраќам само како мајка, туку како човек кој живее со најтешката болка. Ја убиле безмилосно, на најбрутален начин. Детето мое. Вакви работи мислев дека не се случуваат кај нас. Но се случи. И не смее да се повтори. Ниту еден родител не заслужува ваков пекол.“
На рочиштето присуствуваа и двете ќерки на Панче Жежовски, Македонка и Ана, кои исто така се приклучија кон обвинението и побараа имотно-правно обештетување.
Обвинителството во завршните зборови побара максимална казна – доживотен затвор – за четворицата обвинети: Љупчо Палевски, Влатко Кешишев, Боре Видевски и Велибор Манев. За обвинетиот Александар Ѓорчевски, татко на Вања, обвинителката побара соодветна затворска казна.
„Нема потешка казна од загуба на дете и живот со таа совест. Не тврдиме дека сакал да ѝ го одземат животот, но учествувал во киднапирањето на сопствената ќерка. Бараме судот да одреди соодветна казна,“ рече обвинителката.
Судењето продолжува со очекување на конечната одлука на Судот.
