Пожар во стан во Центар – седум лица повредени
Седум лица се здобиле со повреди од вдишување чад во пожар што попладнево, околу 16:30 часот, избувнал во стан на вториот кат од зграда лоцирана на улицата „Кочо Рацин“ во Скопје.
Според информациите од командантот на Бригадата за противпожарна заштита на Град Скопје, Ѕвонко Томевски противпожарната служба интервенирала со две возила, а поради обемот на пожарот, дополнително било испратено уште едно возило.
„Има повредени седум лица бидејќи вдишале чад. Веднаш беа повикани медицински екипи и пружена им е соодветна помош. Пожарот за кратко време беше локализиран и целосно изгаснат“, изјави Томевски.
Сите повредени се во стабилна состојба, а екипи на Министерството за внатрешни работи работат на утврдување на причините за избувнувањето на пожарот.
