Потврдена ослободителната пресуда за велешанката Пале Иловска

Скопскиот Апелационен суд ја потврди ослободителната пресуда за велешанката Павлинка (Пале) Иловска, која лани со нож го усмрти својот насилен партнер, полицаец од Велес. Таа беше обвинета за кривично дело убиство во миг. Иако Обвинителството поднесе жалба и бараше Иловска да биде казнета, сепак Апелација ја потврди пресудата донесена од судијката Габриела Гајдова. Со ова Иловска е целосно ослободена од вина, а пресудата е конечна.

Ослободувањето на Иловска од вина судијката Гајдова го оправда со тоа што таа се бранела од сега починатиот партнер. Од ДНК под ноктите на покојниот полицаец се утврдило дека тој навистина ја давел.

„Во согласност со Кривичниот законик, нужна е одбраната ,која е неопходна. Нападот и одбраната се неопходни елементи. Тој ја влечел, клоцал, ја стегнал околу вратот, неоспорно се утврди од записникот за увид, по самиот увид на настанот, кај обвинетата имало телесни повреди, изразени на главата, ногата и на вратот. Натаму, на овој доказ се надоврзува телесниот преглед на обвинетата“, рече судијката во февруари минатата година кога ја изрече пресудата.

Случајот на Пале Иловска предизвика лавина реакции во јавноста кога се дозна дека таа неколкупати го пријавувала партнерот за малтретирање, но тој не бил гонет. Во постапката Пале докажуваше дека таа го убила со убод во нож додека тој ја давел и дека делото го направила во самоодбрана. Таа беше и во куќен притвор.