„ПОТКОПУВАЊЕ НА АВТОКРАТИЈАТА ВО СРБИЈА“: Германските медиуми со оценка на студентските протести
Во текот на
викендот, бројни германски медиуми објавија за протестите и блокадите на
мостовите во Нови Сад. Агенцијата КНА објави дека поп иконата Мадона ги
поддржува и српските студенти, додека јавниот сервис РББ пишуваше за собири на
солидарност кои се одржале и во Берлин, пренесува Дојче веле.
Поопширни анализи
и коментари може да се најдат и во печатот. Под наслов Поткопување на
автократијата, Берлинскиот Tageszeintung објавува коментар во кој се наведува дека студентите и пошироката јавност
од општеството се кренале против властите во Србија, а не само во големите
градови. „Александар Вучиќ веќе не може да го мобилизира својот народ како
порано. Аргументот дека протестите се менаџираат од странство веќе не
функционира“, пишува левичарскиот весник.
„Берлин и Европа се подготвени да го поддржат
Вучиќ“
Се наведува дека
луѓето во Србија не можат да сметаат на поддршка однадвор, во време кога
либералните демократии се во дефанзива, додека Вучиќ може да смета на
поддршката од автократи како Орбан и Путин. „Балканската политика на Европа и
Германија останува сомнителна. Берлин и Европа се подготвени да го поддржат
Вучиќ“, пишува весникот, додавајќи дека во Србија се гледа фактор на
стабилност, иако Србија под автократска контрола не може да биде.
Весникот „Rheinische Post “ пишува дека под впечатокот за можното враќање на Доналд Трамп во Белата
куќа, едвај се забележува дека има и спротивен тренд – луѓето се креваат против
автократите, на пример во Србија, Словачка и Унгарија. Примерот на Србија, се
наведува, ги покажува „погубните последици од укинувањето на поделбата на
власта во една авторитарна и корумпирана партиска држава“.
„Се повеќе Срби го надминуваат стравот“
Дописникот на
весникот од Белград потсетува дека трошоците за реновирање на железничката
станица во Нови Сад „пораснале“ од 3,5 на 16 милиони евра и дека е свечено
отворена – без употребна дозвола. А потоа се урна настрешницата, што предизвика
протести. Беспомошно изгледаат обидите на Вучиќ да ги смири гневните сограѓани
со коктел од закани и отстапки“, пишува весникот.
„Охрабрени од
протестите, сè повеќе Срби го надминуваат стравот од репресија од страна на
автократскиот режим или губење на работата. Дури и државните службеници кои се
угнетувани со години, како што се судиите, наставниците и новинарите од
државната телевизија РТС, која е контролирани од СНС, се солидаризираат со
протестите“.
„Се чини дека ова е почеток на крајот“
Во текстот се
заклучува дека Вучиќ и СНС нема „доброволно да се откажат од златната кокошка“,
но се чини дека ова е почеток на крајот на автократскиот режим.
„Франкфуртер
алгемајне цајтунг“ се осврна и на ова прашање – каде водат протестите – во
неделното издание. Весникот пишува дека многумина ги полагаат надежите на овие
протести токму затоа што, за разлика од претходните, не ги води непопуларната
опозиција.
„Тоа во моментов
не е можно со студентите. Движењето се заснова на собири по принципот на
директна демократија. Меѓутоа, некои набљудувачи забележуваат дека моменталната
сила на движењето може да стане негова најголема слабост на долг рок.
А германскиот
неделник Der Spiegel објави
кратко интервју со Ведран Џихиќ од австрискиот институт за меѓународна
политика, кој исто така посочува дека она што е ново е што студентите не
дозволуваат опозицијата да ги преземе протестите, туку дека клучното прашање е
нешто друго:
„Режимот негува
наратив кој е мешавина од закани, ветувања за мир, национален патос и
предупредувања за криминалната опозиција. Сè уште има луѓе кои ги прифаќаат
овие пораки. Само владејачката СНС има 800.000 членови, а речиси во сите општини
има апсолутна контрола Клучното прашање е до кој степен „Режимот е подготвен да
употреби насилство“, вели Џихиќ.
фото: EPA-EFE/ANDREJ CUKIC
