ПОПЛАВИТЕ ИМ ГО УНИШТИЈА ОРИЗОТ: Итно мораат да увезат 500.000 тони
Итно мораат да увезат 500.000 тони oткако е уништен оризот во Бангладеш.
Поплавите предизвикани од обилните монсунски дождови ја погодија земјата во два големи бранови во август и октомври, особено во источните и северните региони каде штетите беа најголеми, пренесува Seebiz. Загинаа најмалку 75 луѓе.
Министерството за земјоделство соопшти дека годинашните поплави резултирале со значителна загуба во производството на ориз.
„Како одговор, владата забрзано увезува 500.000 тони ориз и се очекува наскоро да дозволи увоз од приватниот сектор“, изјави претставник на Министерството за храна на Бангладеш.
Преодната влада, која ја презеде власта во август по смртоносните протести што го принудија поранешниот премиер Шеик Хасина да побегне во Индија, се бори да ги стабилизира цените на храната кои се зголемија за скоро 20 отсто во последните месеци.
Од поплавите сериозно беа погодени и други земјоделски производи, меѓу кои и повеќе од 200.000 тони зеленчук. Вкупните земјоделски загуби низ целата земја поради поплавите се проценуваат на околу 45 милијарди така (380 милиони американски долари).
Во 2022 година, Бангладеш беше трета земја во светот по прозводство на ориз. Многу азиски земји се меѓу најголемите производители на ориз во светот.
foto freepik.com
