Помошта од Македонија на пат кон Турција

Македонски спасувачи тимови од Армијата и Дирекцијата за заштита и спасување, како и пожарникари и рудари веќе се на пат кон Турција и ќе помогнат во потрагата под урнатините од земјотресот со јачина од 7,8 степени според Рихтеровата скала што ги погоди регионот на Турција и Сирија.

Хуманитарна помош веќе најавија Владата, повеќе општини и институциите, а граѓаните собираат донации на пункт на плоштадот во Скопје.

Армијата на Република Северна Македонија упати тим за претрага и спасување составен од 24 армиски припадници и две кучиња, коишто веќе заминаа за Турција.

Од Дирекцијата за заштита и спасување се испраќаат 40 лица – припадници на републичките сили за заштита и спасување, со комплетна специјализирана опрема и материјално – технички средства за пребарување и спасување од урнатини, шест возила за транспорт на опремата и луѓето и две противпожарни возила.

Екипи за помош во Газиантеп, Турција веќе се испратени и од Град Скопје, како и од повеќе локалните самоуправи, меѓу кои пожарникари од Битола, Тетово, Гостивар и Штип и рудари од Пробиштип.

Од Град Скопје информираат дека е испратена екипа на Територијалната противпожарна бригада на Град Скопје во Газиантеп, Турција, а денеска на вонредна седница на градскиот Совет е предложено да се одобрат шест милиони денари првична хуманитарна помош за Турција и за Сирија кои беа погодени од разорен земјотрес.

Општина Битола, исто така, денеска на седница ќе одлучуваат за помош за погодените од земјотресот во Турција и Сирија, а вакви седници најавија и други општини, меѓу кои и Центар и Ѓорче Петров.

Одлуки за финансиска помош за подрачјата кои беа погодени од земјотрес во Турција и Сирија, веќе донесоа општините Тетово, Куманово, Кавадарци и Гази Баба.

Министерството за финансии, пак, е задолжено до Владата да достави одлука за одобрување средства од резервите на Буџетот за 2023 година, во износ од 6 милиони денари за помош на настраданите во катастрофалниот земјотрес. Задолженија има и до други институции меѓу кои и до Министерството за здравство, во рамките на своите надлежности, итно да подготви и до Владата да достави одлука за обезбедување помош во вид на медицински персонал, медицинска опрема и лекови.

Од Владата најавија дека земјава ќе испрати помош и за Сирија.