По втор пат се одложи судењето за несреќата во која загина 22-годишна девојка – обвинетиот бил болен, семејството огорчено!

По втор пат се одложи почетокот на повторното судење на Менсур Пајазити кој е обвинет за сообраќајната несреќа во која животот го загуби 22 годишната Теодора Ристовска.

Судијата од Основниот суд во Тетово, Елведин Ферати наведе дека обвинетиот доставил поднесок до судот во кој навел дека од здравствени причини нема да присуства на рочиштето.

Адвокатката Наташа Ѓорчевска, бранител на семејството на Теодора, истакна дека од нејзина страна ќе биде проверено дали лицето навистина е во болница и му е потребно лекување.

Судијата донесе решение со кое ја одложи главната расправа за 7 април 2025 година во 12 часот и 30 минути.

Семејството на Теодора е огорчено од судскиот систем, кој, според нив, овозможува одолговлекување на процесите и неправда.

Група млади лица пред Основниот суд во Тетово протестираа и истакнаа транспаренти преку кои се бара правда за Теодора.