По две години пауза: Град Скопје повторно исплаќа субвенции за инвертер клима-уреди
По двегодишна пауза, скопјани повторно ќе добијат субвенции за набавка на инвертер клима-уреди. Градоначалникот Орце Ѓорѓиевски синоќа ги потпишал решенијата за исплата согласно јавниот повик на кој граѓаните аплицираа претходните месеци.
Со оваа мерка, Градот Скопје финансиски ги поддржува домаќинствата што во текот на 2025 година инвестирале во купување високо ефикасни инвертер клима-уреди. Секоe домаќинство ќе добие надомест до 20.000 денари во нето износ, а пресметката и покривањето на данокот на личен доход ќе го преземе Градот.
„Со субвенциите им помагаме на граѓаните кои вложиле во уреди со пониска потрошувачка на енергија, што значи пониски сметки, повисока енергетска ефикасност и подобри услови за живеење“, наведе Ѓорѓиевски. Тој додаде дека користењето инвертер системи директно придонесува кон намалување на емисиите и подобрување на квалитетот на воздухот, што е еден од приоритетите на градските политики.
Од Градот најавуваат дека во периодот што следи ќе бидат објавени и нови јавни повици за различни видови субвенции со цел да се поддржат домаќинствата и да се унапреди квалитетот на живеењето во главниот град.
