По 4 години Боки 13 излезе од затвор – за што лежеше?
Боки 13 од петокот е на слобода, но за што беше во затовр? Во случајот „Рекет“ Бојан Јовановски – Боки 13 беше осуден на 9 години затвор, а поранешната специјална обвинителка Катица Јанева на 7.
Во „Рекет“ Јовановски е осуден за делата примање награда за противзаконито влијание и за перење пари, а Јанева за злоупотреба на службената положба и овластување.
Во истиот случај со нив, за примање награда за противзаконито влијание, беше обвинет и Зоран Милески-Кичеец, но тој уште на првото рочиште во декември 2019 призна вина и доби затворска казна од 3 години затвор. Таа е правосилна и од октомври лани тој ја издржува во Казнено-поправниот дом (КПД) во Струга.
Според обвинението, а и првостепената пресуда за „Рекет“, откако во ноември 2018 СЈО ја отворило истрагата „Империја“, биле барани пари од осомничениот бизнисмен Орце Камчев, со цел тој да добие повластен третман, како укинување на притвор, враќање на пасошот, но и евентуално својство на заштитен сведок или склучување спогодба. Обвинителството тврдеше, а судечкиот совет смета дека е докажано, дека од Камчев биле изрекетирани 1,5 милиони евра.
Јовановски и Јанева, пак, во текот на судскиот процес ги отфрлаа ваквите тврдења обвинувајќи дека станува збор за монтиран предмет со цел да се спаси бизнисменот Камчев. Предметот го нарекуваа политички, исто како и првостепената пресуда.
Во вториот судски процес пак „Меѓународен сојуз“ беа изречени три затворски казни, една условна и една ослободителна пресуда.
Според одлуката на Кривичниот суд казните за обвинетите се:
Според обвинителството бизнисмени биле измамени со проекти за старечки домови – за одбраната ова е конструиран случај.
Обвинителството за гонење организиран криминал и корупција го поднесе обвинението на 3 јануари 2020 година, судот го одобри на 12 мај истата година, додека судењето започна во јули 2020 година.
Јовановски како претседател на невладината Меѓународен сојуз во случајот е првообвинет и се товари за делата измама и перење пари. Обвинителството тврди дека под превезот на невладината организација, двајцата бизнисмени Силјан Мицевски од градежната компанија „Пелистер“ и Ардијан Амзоски од „Дрим билдинг“ биле доведени во заблуда и измамени со проекти за изградба на Европски центар за возрасни лица и мобилни сервиси и дале речиси еден милион евра – Мицевски сума од 719 905, а Амзоски 233 821 евро.
Јасна Ерцеговиќ, која беше заменик-претседателка на Меѓународниот сојуз, и Христина Блажевска, асистенка на Јовановски, товарат за помагање во делата што ги извршил првообвинетиот.
Поранешната пратеничка од СДСМ, Фросина Ременски, пак, беше опфатена со обвинението поради помагање во делото измама. За неа обвинителството тврдеше дека со својот углед и авторитет го поддржувала Боки и одела на неговите средби со бизнисмените давајќи му совети и упатства за оштетените да стекнат доверба во, според обвинителството,наводниот проект за старечки домови.
Таткото на Боки, Миле Јовановски, во случајот се најде како петообвинет бидејќи, според обвинителството, му помагал во кривичното дело перење пари, а на товар му беше ставено и делото неовластено изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација Меѓународен сојуз.
Од друга страна, пак, обвинетите уште од почетокот на судскиот процес тврдеа дека не станува збор за никаква измама туку за реални проекти и обвинуваа дека предметот е конструкција.
