Патници за Скопје заглавени во Истанбул: Четири пати променет гејт, летот исчезна од информативните табли
Десетина патници од летот ТК1005 на релација Истанбул – Скопје вечерва останаа на аеродромот во Истанбул, откако авиокомпанијата Turkish Airlines не успеа навреме да ги информира за промените на гејтот.
Според сведочења на патниците, гејтот за летот бил променет четири пати, а последната промена од B9A на F7 била соопштена само усно од страна на операторот на гејтот. Веднаш потоа, летот исчезнал од информативните табли на аеродромот, што предизвикало дополнителна конфузија.
„Дел од нас беа на гејтот и три часа пред полетување, но поради хаосот со промените и отсуството на јасни информации, летот ни избега. Имаме и Boarding pass со печат од гејтот како доказ дека сме биле таму“, велат патниците.
Откако случајот бил пријавен до менаџментот на Turkish Airlines, компанијата реагирала со понуда за бесплатни карти за следниот лет кон Скопје, како и ваучери за храна. Тие го признале пропустот, сепак, патниците кои вечерва останаа во Истанбул не добија сместување, иако во повеќето случаи авиокомпаниите се обврзани да го обезбедат.
Поради безбедносни правила, чекираниот багаж од патниците беше отстранет од авионот и поради тоа имаше доцнење од 30 миниту за полетување кон Скопје.
Во повеќето случаи авион не смее да полета со багаж од патник кој не е на летот. Ова е правило кое се вика “baggage reconciliation” и е воведено од безбедносни причини (после терористички инциденти во минатото како бомбашкиот напад на Локерби во 1988).
Подоцна патниците добија само бесплатни карти за следниот утрински лет за Скопје, но ништо од ветените ваучери за храна. Менаџментот рече дека имало грешка во комуникација и дека ваучери следуваат само ако имате поврзани летови. Откако дел од патниците посочија дека доаѓаат од друга дестинација, а Истанбул е само трансфер, вработениот повторно го смени ставот и посочил дека ниту нив не ги следува ваучер за храна.
Патниците најавуваат дека ќе поднесат официјални жалби заради, како што велат, пропустите во организацијата и комуникацијата со кои биле оставени да се снаоѓаат сами.
