Партизан со пресврт го преслуша Жалгирис и остана во игра за плејоф во Евролигата!
Гостите многу подобро го почнаа мечот и набрзо имаа двоцифрено водство (15-4), кое делумно ја загрижи докрај исполнетата „Штарк арена“ во Белград. Тогаш се разигра Американецот Доужер, кој единствен беше расположен кај црно-белите, па со 15 поени само во првата четвртина не му дозволи на противникот да обезбеди поголема предност. Како одминуваше средбата, домашните ја намалуваа негатива, за во второто полувреме носени од навивачите да направат целосен пресврт и да дојдат до посакуваната победа.
Доужер средбата ја заврши со 23 поени, четири асистенции и две украдени топки, а одличен беше и Зек Ледеј со 21 поен, додека Еванс вообичаено беше најдобар во таборот на Жалгирис со 25 постигнати поени.
Изненадување беше победата на Милано против Барселона (74-70), додека на останатите две денешни средби, Валенсија како гостин ја совлада Басконија (77-62), додека Анадолу Ефес дома загуби од Монако (78-80).
