Пари за набавка на „Трикафта“ има само за 15 пациенти

Клиниката за детски болести обезбедила околу 2,9 милиони евра за набавка на „Трикафта“, што е доволно за само 15 пациенти со цистична фиброза, иако има меѓу 130 и 140 пациенти, забележуваат ревизорите во извештајот за финансиското работење на Клиниката за 2022-ра година. Од ДЗР укажале дека е потребно Клиниката, во соработка со Фондот и ресорното министерство, да обезбедат средства за терапија за сите пациенти за кои има докази дека ги исполнуваат медицинските критериуми.

„Не навлегувајќи во медицинската исправност на одлуките на докторите и не оспорувајќи ја потребата од вклучување на пациентите на соодветна терапија, состојбата со ограничен буџет и ограничен број пациенти на кои им се дава терапијата , доведува до ризик од субјективизам при изборот на пациенти кои ќе бидат вклучени на терапија“, пишува во извештајот на Државниот завод за ревизија.

Од Министерството за здравство велат дека не постои субјективен избор на пациенти кои ќе се лекуваат со „Трикафта“. Листата е направена од работна група во Министерството за здравство, по медицински прегледи на сите пациенти со цистична фиброза, според бодирање. Досега 28 пациенти го примиле лекот и тие етапно се вклучуваат на терапија.

„На 24 ноември 2023 година владата на република северна Македонија одобри 854 милиони денари (13 милиони 800 илјади евра) за набавка на лекот „Трикафта“ за пациентите со цистична фиброза за следните две години. Ова се дополнителни финансиски средства на веќе одобрените од министерството за здравство“ велат од ресорното министерство.

Лекот „Трикафта“ за првпат во земјава беше набавен на почетокот на 2022 годината со условен буџет од фондот за здравство за третман на осум пациенти. По една година вклучени беа уште четворица. Во меѓувреме, обезбеди се и други средства за да се продолжи третманот на овие 12 пациенти и да се почне лекување кај 39 нови пациенти.

Андријана Ѓурческа