Отворени гласачките места во Турција: Почна гласањето за вториот круг од претседателските избори
Избирачките места ширум Турција беа отворени утринава во 08:00 часот по локално време, или во 7:00 часот по средноевропско време, што го означи почетокот на гласањето во вториот круг од претседателските избори, јавува Анадолија.
Повеќе од 64 милиони граѓани со право на глас избираат во вториот круг меѓу актуелниот претседател Реџеп Таип Ердоган, кандидатот на Народната алијанса и кандидатот на опозициската Национална алијанса, Кемал Киличдароглу.
Во првиот круг од изборите одржани на 14 мај, Ердоган освои 49,5 отсто од гласовите, а Киличдароглу 44,89 отсто.
Народната алијанса на Ердоган, предводена од владејачката Партија на правдата и развојот, во првиот круг освои мнозинство во државниот парламент.
Врховната изборна комисија ќе ги објави првите прелиминарни и неофицијални резултати од вториот круг на претседателските избори по затворањето на гласачките места.