ОСТРИ ТОНОВИ: Пендаровски вели до крајот на мандатот нема да го покани, Радев му порача да раскине со идолопоклонството од југо-тоталитарниот период
Во последните години најмалку десет пати го поканував претседателот на Република Северна Македонија, Стево Пендаровски да ја посети Бугарија, рече денеска бугарскиот претседател Румен Радев на маргините од конститутивната седница на новоизбраниот состав на Народното собрание, коментирајќи ја синоќешната изјава на шефот на македонската држава дека во последните две години немал ниту еден конструктивен разговор со претседателот на Бугарија.
Пендаровски синоќа во телевизиско интервју за Сител рече дека за танго се потребни двајца, заклучувајќи дека до крајот на мандатот нема да го покани Радев во официјална посета на Македонија.
„Уште на 1 октомври и помогнав на РСМ да добие финансиска помош од ЕУ за струја. Ја разбирам болката на претседателот на РСМ, што јас бев личноста која пред 2 години го постави прашањето за правата на македонските Бугари пред европските институции. Успеав да работам со сите европски институции за да стане задолжителна регистрацијата на македонските Бугари за почеток на преговорите. Се надевам дека Пендаровски ќе сфати дека ова е помош за неговата земја, ќе почне да ја демократизира државата и ќе раскине со идолопоклонството од југо-тоталитарниот период“, вели Радев.
