Ѓоковиќ и со стомачен вирус е пресилен за ривалите

Србинот беше подобар со 7-5, 6-7, 6-4 за место меѓу четворицата најдобри на овој турнир и покрај тоа што, како што рече, се мачи со стомачен вирус последните три дена. Воедно, тој му се одмазди на Руне за поразот во ланското финале во кое загуби во три сета.

Интересно е тоа што, за разлика од вчера, Ѓоковиќ вечерва беше многу посигурен на свој сервис и дозволи само еден брејк и тоа во вториот сет, но веднаш го врати. Во првиот сет се играше израмнето до 5-5 за потоа најдобриот светски тенисер да освои два гема по ред и да поведе со 1-0. Во вториот сет двајцата тенисери направија по еден брејк, но победникот се решаваше во тај брејк каде, на општо изненадување, Руне беше многу подобар и славеше со 7-3.

Клучен беше третиот гем од последниот сет кој Ѓоковиќ го доби на сервис на Руне, а потоа не му даде ни шанса на својот ривал. Во полуфиналето, Новак ќе игра со подобриот од пресметката меѓу Де Мино и Рубљов кои играат вечерва.