Охридските гимназијалци пееа и свиреа за помош на семејствата на настраданите во Кочани
Вечерва учениците од охридската гимназија „Свети климент Охридски“ уште еднаш ја покажаа својата хуманост. Традиционалната музичко-забавна манифестација што ја организираат на крајот на учебната година тие оваа година ја посветија на семејствата на жртвите во големата несреќа во Кочани.
Во присуство на бројна публика во дворот на Гимназијата, учесниците го покажаа својот талент преку изведби на познати музички хитови – од безвременските песни од 60-тите до современи рефрени што ја кренаа атмосферата.
Билетите по цена од 200 денари беа можност секој од посетителите да се вклучи во музичко-сценскиот настан со хуманитарен предзнак. Средствата собрани од продажбата на влезниците ќе бидат уплатени на сметката отворена за помош на семејствата на настраданите во несреќата во Кочани.
