Објавен нов „Речник на синоними во македонскиот јазик“ од авторите Белчев и Веновска-Антевска

Македонската лексикографија е збогатена со ново капитално дело – „Речник на синоними во македонскиот јазик“, авторски труд на д-р Толе Белчев и покојната универзитетска професорка д-р Снежана Веновска-Антевска. Речникот е објавен во издание на „Бата прес“, со поддршка од Министерството за култура како дел од Националната програма за издаваштво за 2025 година.

Овој обемен лексикографски труд се простира на 548 страници и содржи 19.365 заглавни зборови, систематизирани по азбучен ред. Како што наведуваат авторите во предговорот, делото „влегува во богатото семејство на македонски лексикографски трудови“, потсетувајќи на историски дела како четиријазичникот на Ѓорѓија Пулевски и тритомниот речник под редакција на Блаже Конески.

Рецензентот, проф. д-р Максим Каранфиловски, го оцени речникот како „пионерски потфат во македонската лексикографија и лексикологија“, нагласувајќи дека вакви изданија се вистинска реткост во македонскиот јазичен простор.

Особена вредност на речникот е тоа што синонимите се обработени преку асоцијативен модел, што им овозможува на читателите да ги поврзат поимите и со нивните фигуративни и метафорични значења.

Издавачката куќа „Бата прес“ и претходно е позната по објавување на значајни лексикографски дела, како што се „Правописно-нормативен речник на македонскиот стандарден јазик“ и „Речник на туѓи зборови во македонскиот јазик“.