Николовски: Зголемена наплата на приходи од увоз на цигари
Директорот на Царинската управа Бобан Николовски на регионалната конференција за сузбивање на сивата економија што се одржува во Скопје во организација на Американската стопанска комора на Македонија и на Србија, рече дека е зголемена наплатата на царинските приходи по основ на увоз на цигари.
– Во јули е евидентиран за 127 проценти поголем увоз на цигари од јули минатата година. Во септември приходите по основ на пријавен увоз на цигари се зголемени за 46 проценти, а во октомври за 13 проценти. Овие резултати особено ги нагласувам со оглед на тоа дека овде на конференцијата присуствуваат претставници на ОЛАФ и претставници на тутунската индустрија. Дополнително би истакнал дека во овие пет месеци имаме 212 случаи на заплени или речиси двојно повеќе од минатата година. Продолжуваме со имплементација на проекти за модернизација, подобрување на условите за работа и примена на иновативна технологија во нашата работа, особено за подобрување на нашата контролна функција, истакна Николовски.
Од 1 јули годинава откога ја презеде функцијата директор, Николовски посочи дека се преземени значителни чекори во сузбивањето на секој обид на нелегална трговија за што потврда се наплатените приходи од 54,6 милијарди денари, што претставува раст од осум проценти во однос на истиот период лани.
