Невообичаена спасителна акција преку 112 на ЦУК, преку „СОС“ копче на возилото после сообраќајна незгода
Синоќа во периодот до 24.00 часот, имаше невообичаена спасителна акција преку Единствениот број за итни случаи 112 на ЦУК, при што помогна во почетокот вградената аудио „СОС“ опрема („СОС“ копче) на возилото после сообраќајната незгода на раскрсницата Струга – Охрид, во близина на бензинската пумпа на „Макпетрол“.
Конкретно, на Единствениот европски број за итни случаи 112 во ЦУК била побарана помош за повредено лице во возило од сообрќајка преку „СОС“ копчето, што е вградено во некои видови возила од поново производство. Лицето во моментот на јавувањето било снеможено и во возилото и ја повторувало само локацијата на сообраќајката. Во момент кога операторот од 112 во ЦУК остварувал врска со Итната медицинска помош и со МВР, околу возилото дошле и граѓани кои ја забележале сообраќајката и доѓле да помогнат. Операторката од ЦУК стапила во врска со еден од граѓаните којшто и ја опишал ситуацијата, зашто возачот не можел да зборува и не се слушал добро на автоматскита аудио опрема што била вградена во неговото возило. Брзо реагирала Итната медицинска помош и Полицијата и возачот бил спасен.
Инаку „СОС“ копчето, при поголем удар на возило, во коешто е вградено, е програмирано автоматски да дава информација на Единствениот европски број за итни случаи 112 во било која европска држава и пошироко, дека најверојатно се случила сообраќајна незгода, а лицето што го управува автомобилот не е во состојба да се јави. Тоа копче може и случајно да се вклучи, но по остварениот контакт со операторот на Единствениот број за итни случаи 112 на ЦУК, обично јавувачите до сега се извинувале, со благодарност за контактот и го исклучувале „СОС“ копчето.
