Најтопло денеска во Скопје и Демир Капија до 27 степени – попладнево на местa појава на невреме!

МАКСИМАЛНИ ТЕМПЕРАТУРИ: 13 Попова Шапка, 15 Лазарополе, 18 Маврови Анови, Крушево, 20 Берово, 21 Прилеп, Претор, 23 Охрид, Битола, 24 Крива Паланка, 25 Штип, Тетово, 26 Скопје–Зајчев Рид, Струмица, Виница, Гевгелија, Демир Капија, 27 Скопје-Петровец.

НАВРНАТ ВОДЕН ТАЛОГ за изминатите 9 часа до 17 часот (во l/m2): 11 Крушево, 2 Скопје Петровец, Охрид, 1 Демир Капија.

Забелешка: Дадените вредности за количината врнежи се измерени на дождомерните места на УХМР. Поради локалноста на процесите, паднатата количина воден талог многу варира и на различни места може да е многу поголема од измерената.

ВРЕМЕТО ДЕНЕС: Сончево со мала до умерена облачност. Попладнево имаше локален развој на нестабилна облачност проследена со пороен дожд, грмежи и засилен ветер. На места имаше и краткотрајно поинтензивни процеси со изолирана појава на ситен град (Велешко, Пелагонија, Кумановско, Полог).

ВРЕМЕТО ДО КРАЈОТ НА ДЕНОТ: Сончево со мала до умерена облачност. На места и понатаму ќе биде нестабилно со пороен дожд, грмежи и засилување на ветерот.

ВРЕМЕТО УТРЕ: Претпладне со умерена облачност, од пладне нестабилно со локален пороен дожд, грмежи и засилен ветер. На места ќе има поинтензивни процеси во форма на краткотрајно невреме со силен ветер и изолирана појава на град. Минималната температура ќе биде во интервал од 8 до 14, а максималната ќе достигне од 21 до 27 степени.

Во Скопје претпладне умерено облачно, попладне во делови од котлината ќе биде нестабилно со пороен дожд, грмежи, засилен ветер и услови за изолирана појава на град. Минималната температура ќе се спушти до 13, а максималната ќе достигне 26 степени.

ВРЕМЕТО ВО НАРЕДНИТЕ ДЕНОВИ: Влијанието на циклонската активност од југоисток ќе услови времето и во следните денови да се задржи претпладне посончево, а попладне променливо облачно со локален пороен дожд и грмежи. На места процесите ќе бидат поинтензивни во форма на краткотрајно невреме со интензивен дожд, силен ветер, електрични празнења и појава на град.