Најголемиот трговец со пестициди во Македонија доби нов српски газда
Најголемиот трговец со пестициди за заштита на земјоделските плодови во Македонија, „Хемомак“ од Велес, доби нов српски газда – Агромаркет Логистик од Крагуевац, најголемата компанија за оваа дејност во регионот.
„Хемомак“ е една од најголемите компании од Велес и редовно е меѓу десетте друштва со најголеми приходи во рамките на оваа општина. Лани оствари вкупни приходи од 8,4 милиони евра со само 25 вработени.
Велешанецот Горан Јовановиќ останува и натаму како еден од сопствениците на компанијата која се грижи за „продолжување на животите“ на производите во македонското земјоделство, а според договорот за преземање на удел, ќе може да потпишува самостојно трансакции до 300.000 евра. Јовановиќ ја потврди информацијата за „Фактор“, но ни рече дека не е овластен од партнерот да дава изјави.
Инаку Агромаркет Логистик е водечки дистрибутер, претставник и производител на најширокото портфолио на агро и градинарски производи на пазарот на Западен Балкан. Дистрибуира повеќе од 40 отсто пестициди на пазарните области на Србија и околу 1/3 од пазарите во околните земји (Босна и Херцеговина, Црна Гора, Македонија, Косово, Словенија и Албанија), додека семенските производи заземаат над 25 проценти од пазарот. Во делот на ѓубрива (т.н. тонажни и растворливи во вода) компанијата има учество до 25 проценти. Овие бројки се слични и во соседните земји каде што компанијата Агромаркет е присутна преку своите дистрибутивни центри.
Секојдневно доставува производи до над 3.500 малопродажни и големопродажни објекти, од кои повеќе од 2.000 земјоделски аптеки, преку 100 земјоделски имоти и земјоделски задруги, повеќе од 200 земјоделски фарми, над 100 хипермаркети и околу 1.000 објекти кои продаваат градинарски производи.
Агромаркет е дел од холдингот Агромаркет Група, во која влегуваат 11 фирми и заедно остваруваат над 250 милиони евра годишно. Холдингот пред три години ја купи „Семенарна Љубљана“ во Словенија.
А.К.
